भोंडला

Sep 9, 2022
7 min read

Updated: Sep 10, 2022

"भोंडला"

भोंडला,भुलाई,हादगा अशा वेगवेगळ्या नावांनी ओळखला जाणारा नवरात्रोत्सव आणि त्यातील लोकगीते काळाच्या ओघात लुप्त होत चालली आहेत.घरातल्या मोठ्या व्यक्ती,आजी यांना ती सारी लोकगीते अगदी तोंडपाठ होती,परंतु त्याची कुठेही नोंद न घेतल्याने संस्कृती,गाणी सारे काही विरून जाते आहे.अशा दुर्मिळ लोकगीतांचा "स्मृतीगंध" या गटावर दरवळवतो आहे.हा अनमोल ठेवा असाच जपा ! लोकसंस्कृती आपण जपली तरच पुढच्या पिढीत त्याचे संक्रमण होऊ शकते, त्यामुळे आपल्या आई,बहीण,जावा,मैत्रिणी सगळ्यांना हा "नवरात्रीचा अमूल्य ठेवा" सुपूर्त करा "स्मृतीगंध" दरवळत ठेवा.

१ ) ऐलमा पैलमा गणेश देवा, माझा खेळ मांडून दे, करीन तुझी सेवा

माझा खेळ मांडिला वेशीच्या दारी, पारवं घुमतय पारावरी

गोदावरी काठच्या उमाजी नायका, आमच्या गावच्या भुलोजी बायका

एविनी गा तेविनी गा

आमच्या आया तुमच्या आया, खातील काय दुधोंडे

दुधोंडयाची लागली टाळी , आयुष्य दे रे भामाळी

माळी गेला शेता भाता, पाऊस पडला येता जाता

पड पड पावसा थेंबोथेंबी, थेंबोथेंबी आडव्या लोंबी,

आडव्या लोंबती अंगणा

अंगणा तुझी सात वर्षे, भोंडल्या तुझी सोळा वर्षे

अतुल्या मतुल्या चरणी चातुल्या,

चरणी चारचोडे, हातपाय खणखणीत गोडे

एकेक गोडा विसाविसाचा, साड्या डांगर नेसायच्या

नेसा गं नेसा बाहुल्यांनो, अडीच वर्षे पावल्यांनो

**********

२ ) श्रीकांता कमलाकांता असं कसं झालं.

असं कसं वेडं माझ्या नशिबी आलं

वेडयाच्या बायकोने केले होते लाडू